چهارشنبه 30 اسفند 1391

زندگینامه عبدالعلی مُجازی

آدیم عبدالعلی، سوی آدیم مُجازی، (آسلان) تخلص ائدیرم
آتامین آدی یوسف، دوْغوم ایل 4/7/1313 گوٍنش ایل
دوغوم یئری آذربایجانین گؤنئی ماحالی،‌ شبستر شهری نین شمالیندا، میشو داغی نین سولو-چایلی، چئشمه لی-بولاقلی،گوٍل- چیچکلی، باغ باغاتلی، خوش هاوالی اتک لرینده یئرله شن شانجان کندینده بیر ائرکن ال صنعتلی ( آزاد و ابتدائی)‌ بینا سالان، مال داوار ساخلایان، اکینچی لیک ائدن و شال توخوماقلا ایمرار معاش ائدن بیرعائله ده آنادان اوْلموشام.
آذربایجانین وضعیتی خاراب اوْلدوغونا و تحصیل ایمکانی اوْلمادیغینا گؤره 11 یاشیما قدر سوادسیز ایمیشم، 1324دن 1325 نجی ایله قدر میللی حؤکوٍمت (فرقه دموکرات) زمانی، تحصیل ایجباری اوْلدوغونا گؤره بیر ایل آنا دیلیمده درس اوخوماغا نائل اولموشام.
ائله بو ایللرده کی بیر آز عاقلیم کسیردی، مهربان آنامین سؤز سوْویندان، باشلارینا گلن قضو قدرلریندن، شاهلاردان،‌ خانلاردان،‌ به ی لردن، ائرمنی موٍسلمان ساواشیندان، قدیم کندلرین و ائولرین تالانماسیندان، باهالیقدان، آجلیقدان، طاعون، وبا خسته لیگیندن، دب لردن، رسم لردن،‌ دوٍزگوٍنلوکدن، ایماندان، قیامتدن و شیرین – شیرین ناغیل لاردان بهره لنمیشم.
12 یاشیمدا میللی حؤکومت دییشیلندن سوْنرا همان 1325- نجی ایلین اسفند آییندا تهرانا مهاجرت ائتمه مجبورییتینه معروض قالمیشام .
هر حالدا 57 ایل، 1382- نجی ایله نسبت، تهراندا یاشادیغیما و فارس دیلی و ادبیاتیندا، ادبی تحصیل آلماغیما و 25 ایل اداره لرین دفتر و یازی ایشلرینده ایشله مک و مختلف مدیریّت و اداری دؤره لری گؤردوگوٍمه باخمایاراق، آنا دیلیمده یازیب یاراتماقی اؤزوٍمه بیر یوٍکسک بوْرج بیلمیشم.
اوشاقلیقدان توٍرکو دیلینه عاشیق اوْلدوغوما و بیر ایل ده اوشاقلیقدا توٍرکو اوخوماغیما گؤره و آنامین شیرین – شیرین لایلالاری سینما پرده سی کیمی گؤزومون اؤنوندن کئچر و یادیما دوٍشرکن هر هارادا روزنامه، کیتاب و نشریه تاپسایدیم، آلاردیم اوْخویاردیم و ساخلایاردیم، ایندییه جک نئچه دؤنه یازدیقلاریم و کیتابلاریم جیریلیب، ایسلانیب و یانیبدیر، یئنه او مسئله لره باخمایاراق، انقلابدان بویانا هر نه کیتاب، روزنامه و درگی چاپ اولوب دور، چالیشمیشام کی آلیم، اوْخویوم و ساخلاییم، ایندی 70 یاشیمدا اؤز ائو کیتابخانامدا یازیب، یاراتماقلا باشیمی قاتیرام.
توٍرکون تکمیلی ادبی دیلینی اؤیرندیگیم اوُستادلاردان نئچه سی نین آدینی گتیریرم و اوْنلارین اؤلن لرینه رحمت، قالانلارینا یوٍکسک نائلیت لر و اوزون عؤمور اولوتانری دان دیله ییرم.
مرحوم دکتر تیمور پیر هاشمی، دکتر حمید نطقی، پروفسور محمد تقی زهتابی، پروفسور غلامحسین بیگدلی، پروفسور حمید محمـدزاده، اوُستـاد عبدالکریم منظوری خـامنـه، علی کمالی، علی تبـریـزی، و قـارداشیـم قـدرت الله مجازی، دکتر جواد هیئت، دکتر حسین محمدزاده صدیق، اوُستاد یحیی شیدا و اوُستاد محمد علی قوسی فرزانه و...
انجمن لردن : اوُستاد شهریار درنگی ـ گونئی مدنیت اوْجاغی و آیری ادبی انجمن لر …
ایندی ایسه آنا دیلیمده شعر یازماقلا و فولکلور ساحه سینده تحقیقات آپارماقلا،‌ شانجانین مونوگرافیاسی نین حاضیرلانماسی ایله مشغولام .
فولکلور ساحه سینده ( سایالار، کؤسالار، قوْچ قاتما ،دول گلمه، قیرخیخ، نوروز بایرامی و آخیر چرشنبه مراسیم لری، چیل یاسین، آب نیسان، دب لر، مراسیم لر، ناغیل لار وسایره…) قونولاردا مقاله لر یازمیشام.
اوُستاد شهریارین مبارزه لی شعرلری مقاله نی 1376- نجی ایلده باکی کنفرانسیندا اوْخویور و اوْ کنفرانسا تقدیم ائتمیشم و همی ده مهد آزادی قزئتینده چاپ اولوبدور.
1381-نجی گوٍنش ایلین دی آییندا یئنه ده باکیدا قورولان فوْلکلور سمیناریندا ایشتیراک ائدیر و سایالار ساحه سینده مقاله ارائه وئرمیشم.
28/12/1383 دن 2/1/1384 - نجی ایله قدر باکی شهرینده فولکلور سمیناریندا ایشتراک و نوروز بایرامی مراسیملری باره ده مقاله ارائه اتمیشم.
گوٍنئی مدنیت اوجاغی نین بیرینجی کیتابیندا شانجان حاققیندا مقاله و شکیل لری ارائه وئرمیشم و چاپ اولونوبدور.
"عبرت دیواری" آدلی کیتابی200 صفحه یه قدر تنظیم و بیر آزجا سایلا (200 جیلد) چاپ اولوبدور.
نئچه کیتابین دا ادیتورو اولموشام،گونئیلی بگین مئشین کیتابی و دده قورقود کیتابی و گوٍلدورلو ولی نین، بهروانین و مرادی نین شعر مجموعه سی کیتابلارینی و فولکلور قیلاووزو کیتابلارینی و آیری – آیری چاپا حاضیرلانان کیتابلاردان تصحیح ائتمگه ایمکان تاپمیشام.
اوٍُستاد شهریار آدینا ادبی انجمن (شهریار درنگی) و گوٍنئی مدنیّت اوْجاغی نین مؤسس هیئت لریندن اوْلموشام.
جمهوری آذربایجانین شاعیر لریندن صابیر رستمخانلی، نصرت کسمنلی، محمد آراز، بختیار وهاب زاده، خلیل رضا، امیر پهلوان و گوٍل نیگار رحیملی دن شعرلر اؤز الفبامیزا کؤچورموشم و مهد آزادی روزنامه سینده چاپ اولوبدور.
عزیزه خانیم جعفرزاده نین یازدیقی عاشیق پری مجلیسی نین شاعره لریندن گوٍلشاد خانم و سایره لریندن ده کؤچوٍرموشم کی روزنامه لرده چاپ اوْلوبلار.
ایندی ایسه 1368-دن تقاعددا یاشاماغیما باخمایاراق، گونئی منطقه سی و خصوصی ایله آتا-بابا یوردوم و اوٍرکدن سئودیگیم شانجان کندی نین مونوگرافیاسین الیمدن گلن قدر یازیرام، انشا الله گله جکده چاپ اولاجاق.

 

عبدالعلی مُجازی (آسلان - شانجان)
تـــهران 14 /6/1384



 

کليه حقوق اين سايت متعلق به گروه زیست محیطی یاشیل میشو شهرستان شبستر می باشد و استفاده از مطالب آن با ذکر منبع بلامانع است
تلفن: 04142421810 - فاکس: 04142427272 - پست الکترونيک: Yashilmisho.ngo@gmail.com

Designed by Shabestar.net