پنجشنبه 27 تير 1392

زیروه لی داغلار

داغ آدلانان هوندرویئر،چوخ دیک دؤشلو و اوجالیغی اطرافینداکی اراضی نین اوستونده و محدوده سی بللی اولان یوکسکلیک دیر داغلار،عمومتیله زنجیر شکلینده بیربیرینه ایلیشیب دایانما قدادیرلار.دونیانین ان تانینمیش اوجا داغلاری«نپال»دا هیمالیا «سوئیس»ده آلپ وباشقا اولکه  لرین یوکسک قایالیق داغلاریندان عبارتدیر.  

بیلیندیگی کیمی داغلار قوینیندا مالکیت مسئله سی اورتادا اولمادیفی اوچون ،اویئرلرده قورخو و دهشتدن خبر اولماز بلکه امین-آمانلیق سایه سینده هرکس اوزونو او محیط ده راحت و آزاد حس ائده ر ومعنوی گوزیله زیروه ده دالغالانان باریش با یراغینی گوروب ، اوره گی سوینچ حسلریله دولار. نئجه که حضرت موسی یه سینا داغیندا10فرمان لوحی تانری طرفیندن باغیشلاندی،هابئله حضرت عیسی مسیح زیتون داغیندا شاگرد لرینه و غط ائدردی و اسلام پیغمبری مبعوث اولمادان اوئجه حرا داغیندا راز و نیازه مشغول اولاردی.    

آذربایجان داغلارینا گلدیکده ساوالان یا سبلان 4844متره یوکسک لیکده، زیروه ده کی گؤلو ایله دونیا بهشتی نین بیر گوشه ساییلماقلادیر.اودلار دیاری نین یاشیل و سولو داغلارینی سایماقلا باشا گلمز انجاق«سهند»بُز گوش،میشو،حیدربابا،ائل دایاغی،هشته سرواورین دن آد آپارماق اولور.                                    

داغلارین و قارینی،عظمت وعلویتینی یا زمان اوچون مطلق مئشه لرقلم،دنیزلرمرکب اولمالیدیر.داغ سؤزو ایله تسمیه اولان بعضی جانلی لاردان،اوجمله دن داغ مارالی،داغ قویونو،داغ مرینوسو،داغ گئچیسی،داغ قارقاسی،داغ سیچانی،داغ آییسی،داغ سئرچه سی، داغ چیچگی و یئر آلتی قایناغی اولان((داغ بلوری)) ندان آد آپارماق اولور . 

یوزلرجه آذربایجان شاعری یوردوموزون وقارلی داغلاری حاققیندا چوخ گوزه ل واوره گه یاشیم احساسلی شعرلر قوشموشلار او جمله دن آلماس ایلدیریم آذربایجان داغلاری حاققیندا بئله دئمیشدیر((قوشما))

چیچکلی قوینوندا بیر باغچا تیکدیم                        

  اونو سووارماغا گوز یاشی توکدوم

گئجه گوندوز امگینی من چکدیم                            

بولدو میوه  سینی ائللر، آ ، داغلار

داها سونرالار اوستاد محمد حسین بهجت تبریزی،شهریار تخلصی ایله حیدربابا آدلی داغا خطابا بئله دئمیشدیر.

حیدربابا،داغین داشین سره سی     

کهلیک اوخور،دالیسیندا فره سی                                                                    

قوزولارین آغی،بوزی،قره سی .

بیرگئدیدیم داغ دره لر اوزونو              

اوخو یایدیم ((چوبان،قایتار قوزونو))

دئمک اولور که اوستاد شهریار 11 هجالی 3*4*4 بولگولو حیدربابا منظومه سینی آناسی خاطرینه 1332ه ش ده یاراتما قلا،آذربایجانین ادبی بنوهره سین یئنی دن باسمیش و اولمز بیر احساسلی و لیریکا اثری اولاراق آذربایجان ادبیاتی خزینه سینه باغیشلا میشدیر.

اگراوستاد شهریارین صحتی و ساغلیغی یئرینده اولسایدی مطلق آذربایجان ائلی-اوباسی اوچون بویوک بیر طب عالیمی اولوردو،نه یازیق که گنج یاشلاریندا آذربایجانا خور باخان گئچمیش رژیمین شاعر و ادیبلری ، اوستاد شهریاری دوز یولیندان چاشدیر دیلار       یارادیجی ادیبلر،انسان عظمتینی و علوتینی اولو داغلارا بنزتمیشلر.داغلارهوندورلوگونده وقارصاحبی اولان صمد وورغون آذربایجان داغلارینا خطابا،گرایلی فورماسی قوشمادا بئیله دئمیشدیر :          

چوخ گئچمیشم بوداغلاردان                                                                                                       

دورناگوزلو بولاقلاردان                                                                                                                        

ائشیتمیشم اوزاقلاردان                                                                                                                           

ساکت آخان آراز لاری                                                                                                                       

سینامیشام دوستو،یاری                                                                                                                              

ائل بیلیرکه سن منیمسن،یوردوم،یووام،مسکنیمسن،آنام،دوغما وطنیمسن!

آیریلارمی کونول جاندان !            

آذربایجان ، آذربایجان !

ها بئله رئالیست شاعر و لوغت شناس احمد شایا ((آلاو))صفره اتحاف ،گرایلی قوشما سیندا بئله دئمیشدیر.

داغلار کیمی اگیلمه ین

سن بیر ائلین وقاریسان

طوفانلارا باش قالدیران

قیشلارقووان باهار یسان .

مرد دوغولدون ائلین کیمی                                                                                                                            

کور اولمادی ائل اوجاغی                                                                                                                  

سارسیلمایان غرمین سنین                                                                                                                 

خاطیرلادار هوندورداغی.

موغان اوغلی تخلصلی شاعرده ساوالانین تعریفینده بئله ترنم ائتمیشدیر:

آی ساولان،آخارسویون شاریلدار                                                                                                             

چایلاریندا چانقیل لارین خاریلدار                                                                                                                 

کهلیک اوتون کهریزلرده پاریلدار.                                                                                                                      

قیز گلینین گئدر سویا-کهریزه                                                                                                                  

اوخویارلار نغمه،لاله-نرگیزه.

ائل-اوبامیزین یاخشی تایندیغی حورمتلی عباسقلی دهقان جنابلاری اوزون ایللر بویودورکه آنا دیلیمیزده شعریازیب یارادان چوخ درین احساسلی-دویغولو بیرشاعردیر،اونون یاراتدیغی اوره گه یاتیم مصراعلاری همیشه توی-بایرام وشادلیق مجلسلری نین زینتی و صفاسی اولموشدور.

شاعر طبیعته دریندن وورغون اولدوغو اوچون الهام قایناغی جوشاراق میشوداغی حاققیندا دا اوزون بیر منظومه نین ایلک مصرعسینی بئله قلمه آلمیسندیر:

میشووم شانلی داغیم،گوللو باغیمسان،دایاغیمسان .

داها سونراکی مصراعلاردا میشو داغی نین دره لرینی،تپه لرینی،بولاقلارینی،هابئله بوتون گوزه للیک لرینی قلمه آلاراق،گونئیین تاریخی و حماسی سیمالاریندان هابئله شاعر و یازیچلاریندان آد آپارمیشدیر،اوجمله دن اولومسوز((قشم)) دن((معجز)) دن و شبسترلی عارفدن آد آپاراراق بئله یازمیشدیر:

گوردون ائل شاعری قوینوندا یاتیبدیر هاوالاندین،قشمین تئللی سازیندان هوس آلدین صفالاندین .

میشو ! الهام داغیمیزسان سنه معجز نه یاراشدی،سنده عشقین قوشو آچدی قانادین،گویلره قاشدی.

شیخ محمود تکین عارف فرزانه سنین دیر       

باغ عرفاندا آچان عطریلی ریحان سنین دیر.

من سنین سن ده منیمسن میشووم                    

آنا یوردوم وطنیمسن میشووم

گونئی بولبولو عاشیق قشم ده میشو داغینا چوخلو شعرلر قوشموشدور،اونون ایلک شعر توبلو سونو حورمتلی ادیب داور زمانخانی حاضیرلامیش و 1358 نجی گونش ایلینده باسدیرمیشدیر.

صدفلی ساز شاعری،داغلار حاققیندا بئله دئمیشدیر:

میشو داغی((سهند)) ایله قارداشسان                                                                                                        

آغری داسنه باخیر،سیرداشسان،گورپون،کولوک باتماز،سینمایان داشسان.                                                      

میشوداغی! هئچ واخت سولماز گوللرین،جمع اولار باشیوا آغیرائللرین .                                                              

چوبانلارین سنده توتک چالاندا،                                                                                                                    

آچان گوللر سندن الهام آلاندا                                                                                                                 

یایلاقلاردا چیرا قلارین یاناندا.

میشوداغی اینجی مه سین آیاغین                 

قوجالماسین سنه گلن قوناغین.

سوز داغارجیغی عاشیق قشم((ائل منی آتماز))اثرینی،بویوک رئالیست شاعری سلیمان رستمه اتحاف ائتدیگی اوچون،اوداهی شاعری یاد ائده رک((کوراوغلی))عنوانلی شعریندن بیر پارچا اوخویاراق سوزلریمی سونا چاتدیریرام .

یاتیب قیر آتی نین بئلینه یئنه                        قافقاز داغلارینی آشدی کوراوغلی

قایتب قاباغینا یاد ائللی لری                         کورکیمی1 کوپوروب داشدی کوراوغلی

گزدی آت بئلینده،مین کند،مین شهر                پارچا-پارچا اولدو آلتیندا یه هر

گونشین الینی سیخیب هر سحر                    گئچیلمز یئرلردن گئچدی کوراوغلی

چاخدی شمشک کیمی قیر آتین نالی              بیر قوغا بنزه دی هاوادا یالی

هر بولاق باشیندا گوزه ل حیالی                     قیز لاردان سو آلیب ایچدی کوراوغلی

عشق اولسون صفالی داغلاریمیزا و پولاد اراده لی داغچیلاریمیزا !

                                                                                                                            محمدعلی نقابی 30/1/85

-قفقازین ان بویوک چایی دیر،تورکیه دن آخاراق خزر دنیز ینه توکولور.

   

1: نام رودخانه

 



 

کليه حقوق اين سايت متعلق به گروه زیست محیطی یاشیل میشو شهرستان شبستر می باشد و استفاده از مطالب آن با ذکر منبع بلامانع است
تلفن: 04142421810 - فاکس: 04142427272 - پست الکترونيک: Yashilmisho.ngo@gmail.com

Designed by Shabestar.net